لوحة رائعة

الناس بغير دولة بجدهم يلحكون

وما عدهم خواطر تبقى مكسوره

واحنه بكاعنا تنزل من الكاروك

تلكا امك عجوز ووالدك صوره

-----

كاظم السماوي 

بيت ابو ذيه

تنيت براس عكد الهوى ماجن

وبيه الكاع والحيطان ماجن

قيس العامري برادتي ماجن

تنيته بعالم الذر للمنيه

------

بقلمي

١٣/٤/٢٠١٤

باقة ابوذيات

---

العوارض كبل وكتي بيض بالدين
على الي جمع كل الحسن بالدين
ما يدري اوفي الدين بالدين
وابات بلاش واهمومي بديه 
------
صعب عن اليفزعك تصد بجفاي
وعلى الغيبه يبيع الجدر بجفاي
التجازيه بوصل يجزاك بجفاي
ويمن لو سلم بعينه عليه 
-----
اهم وكبال عيني سبب هماي
اروب اللبن بيدي ويرد هماي
افيش التطب حلكي تصير هم اي
كرص مدري انجويت ونار بيه 
-----
يفل زلفه ويرد ينسل بجعداه 
مدرج والذهب يلمع بجعداه
امه جابته ودخلت بجعداه 
اهم بيه ودلاله عم عليه 
-------
اعذرني لو بدن مني ملالاي
وكضت العمر بس اسمع ملالاي
ولا منهم بكراسه ملالاي 
فرح مره وكتب سطرين ليه 
------
بقلمي
4-2-2014

ابوذيات

---

ثمان بتوت قلبي وصفن بتين 
على الخلطت خدود التوت بتين
امس بالسوك مرن علي بتين 
اذا بالكاع حور اعرضن ليه 
------
طلب هدنة يساهي العين حرباك 
ولبيب العكل من وصفك حرباك 
ثلج ترجف واحس تموز حرباك
خجل هذا يبو خدود النديه 
------
منهو بغيبتي وياك بسبس
ومنهو الكال من الشهد بسبس
شيعزل الشكر من الدبس بسبس
اذا يحمن يموعن لك سيويه 
------
عليك بشارة اهل البيت جدنه
عوام وما يشور بيك جدنه
اذا ع الجود احنه هواي جدنه
بقى جودك يبو ذات الابيه 
------
بقلمي قبل قهوة الصباح

للشهيد الصدر الثاني

شاهدت مقطع للسيد الشهيد محمد محمد صادق الصدر قدس الله نفسه الزكيه
بين محبيه وهو يعطي الدروس ويستقبل الناس ليقدم لهم من مخزونه العلمي ذلك
البحر المتلاطم من علوم اهل البيت عليهم السلام 
فاثار المنظر قريحتي بهذه الابيات البسيطه 
------
هاي وين ايام نورك يا شهيد 
اليوم ظلمه بيها مكسوف القمر
من غبت عنا يبو مؤمل دريت 
الشيعه كلها مهدده بحالة خطر
عكب عينك سيدي استاسد الفار
السعودية وتساندها قطر
كوم جرد سيفك الحك للنزال
رد علي بمحرابه هاليوم انطبر
شوف ابنك سيدي وابن الحكيم
طبوا بدربونه مشبوهة بعهر
كولهم يا سيدي وانته الهمام 
المسأله تحتاج تدقيق وفكر
الامس لطخ بدمك عمود الكهرباء
يريد يقطع روؤسنا مثل الشمر
تقبل البعثي يحكمنا من جديد 
وانته كلت البعث مصدر للكفر
وانته كلت البعث مصدر للكفر
------
ملاحظة - للتوضيح دربونة العهر هنا هو التقارب مع
قائمة متحدون وما يشاع حول ذلك شائعات نأمل ان لا تكون
حقيقة 
بقلم ابو تركي البدري
13-1-2014

اجالبهن واشد جروح بجروح

اجالبهن واشد جروح بجروح
واضمد نزف ذيج بنزف هاي
وتنشدني اعله حالي وعينك تشوف
واضن هاي اشد من عظم بلواي
انترس كأس الصبر دم وطفح غيض
وتسألني واكلك لا جذب جاي
بكثر ما بيك مغرم طفتك اشواط
مثل ما طاف سبع اشواطه الحاي
بشمس تموز تجوي جفوفي الروح
يل روحك بظل وبرد وافياي 
حقك لو كلت تخلص سلامات
لان ماتحس نار التصلي اجلاي
-----
بقلمي

جنت احلم حلم

جنت احلم حلم
--------
جنت احلم حلم تتصافا القلوب
واشوفك يا وطن خالي من الجروح
لكيت اخوان يوسف عدهم حساب
يغطون اعلى سرهم وهو مفضوح
كلهم يا وطن مو يوسف انه 
والله ما يخلي حمل مطروح
هسه تبين الحنطه من الكشاش
وبالك لا تكل للخان مسموح
باجر ثوبهم عار ومذلات 
مثل عار اللحك بالشيخ نصوح
------
الشيخ نصوح مفتي النصرة الذي افتى بقتل اي شيخ يساند النظام السوري
وتم ضبطه وهو يزني بحفيدته 
اجلكم الله